ابناؤكم في خدمتكم

صورة

أنصار الشريعة وما ادراك ما انصار الشريعة…!

تقوللهم يسار يقولولك يمين… ومانَّش متكلمين على شيء غير على موضوع اللي صار في المدرسة الاوروبية اللي في بنغازي…

انصار الشريعة “اللي هما ماعندهمش اي صفة قانونية او اعتبارية وجسم غير معرف” مابين مليشية إلى منظمة غير مرخصة… بأي صفة تقتحم المدرسة وتركب في الرعشة… شوية وسمعنا وحدة منهم حتقول شن درنالهم يا حبيبتي…!

الموضوع معرفتش نكتب عليه بكل… لانه دراه كبد من الاخير!!

خير الكلام ما قل ودل… قولولي شن دخل انصار الشريعة في وزارة التعليم، اقوللكم عليش ليبيا عايشة في عيشة ماهي هنيئة!

Kg1 Rixos

CYMERA_20130224_004318

سبعة سبعة الفين وإطناش … تاريخ مميز للدولة والثورة الليبية، في هذا اليوم انطلق مئات الالاف في ربوع الوطن مسرعين الى المدارس ليغمسوا اصابعهم في الحبر ويضع صوتهم في الصندوق في عملية إنتخابية غير نزيهة…

فالنزاهة ليست ان تضع صوت وتراقب انتخاباتك وان تنتهي العملية دون تزوير… الزاهة تقتضي ان تعرف لمن ستمنح صوتك!

الليبيون منحوا اصواتهم لشخصيات او لتوصيات او لصور …

فرصة الدعاية الإنتخابية كانت قصيرة جدًا وكان ينبغي ان تكون اطول وبطرق افضل ليعرف الناخب من ينتخب …

هذا الخطأ (والذي ارى اننا سنقع فيه مرة اخرى فنحن لا نتعلم من اخطاءنا)…

المهم الكلام هضا معروف ومش لازم الواحد يعاود الدوة فيه،

لكن توا لازم نفش غلي…. اللي يحكمونا يا سادة هم مجرد اطفال روضة الزهور…!

وانا عندي الوثائق والمستندات اللي تتبث كلامي (اصلا هضا الشائع تقول عندك دليل كلهم يقولولك بالوثائق ومعندهم شيء!! ) …

اهو ها انا عندي الوثائق وشوفوا كلام عضو المؤتمر الفاضل :

نقل حرفي عن محمد خليل الزروق 23/2/2013

اليوم من أسوأ أيام المؤتمر
ما زال الجرحى في القاعة بتحريض بعض الأعضاء
تذمر عارم من الوضع الأمني الذي يعرقل عمل المؤتمر
من الموضوعات المعروضة قانون مفوضية الانتخابات للجنة الدستور
طالب بعض الأعضاء بتعليق الجلسات
طالب بعضهم باستدعاء الحكومة
حضر رئيس الحكومة
حمّلت في كلمتي الحكومة مسؤولية ما يجري
قلت للأعضاء: لا تعطوا الأزلام بغيتهم في تعطيل عمل المؤتمر أو إسقاطه وهو الممثل للشعب
نحن نعمل في ظروف استثنائية، وهذا جهاد لا يقل عن الجهاد الحربي
اتخذوا القرارات الحازمة وأعلنوا للشعب أن الحكومة تستخف بقراراتكم
الناس سندكم في مواجهة الأزلام
وقد أظهروا لكم في الاحتفال بذكرى الثورة أنهم مع الشرعية
وأنهم يستطيعون إبطال كيد الأعداء
سألت رئيس الوزراء عن مؤتمر باريس
وعن محاولة الالتفاف على قرار المؤتمر في إنفاذ قانون الحكم المحلي بلا تعديل
وهو يقتضي الانتخاب وتسييل الميزانية
قال له الأعضاء صراحة: إنك ستعين الأزلام
لأن تجربة تشكيل الحكومة عرفتنا ذلك وبعض الأسماء التي تسربت
ذكروا له استحواذه على إدارة المشروعات وفيه شبه الفساد
قالوا له إن قرارك ليس بيدك
كانت يجيب بكل برود
لم أقتنع بإجابة واحدة مما قال
شعرت أنه يرواغ
مؤتمر باريس خطير جدا
قال إنه سيرسل إلينا تقريرا
كان من المفروض أن يعرض اليوم التحصين الدستوري للعزل السياسي
حتى لا يطعن عليه أمام المحكمة الدستورية
يتطلب الثلثين من الأصوات
لن يعطوه هذا المقدار
كنت أتحدث بانفعال وكان عضو المؤتمر التواتي العيضة يشوش علي بتقليد صوتي
كأننا في مسرح أو سينما أو شارع
من كان يظن أن العزل السياسي هو من قبيل التنافس الحزبي
فليفق من سباته
لأن أزلام الطاغية ليسوا منافسين سياسيين
لأنهم خصوم الثورة
وقد رُدوا فعادوا إلى ما كانوا عليه
والله المستعان على ما يصفون

هضا شن معناه؟؟ معناها في المؤتمر في اطفال مشاغبين ما يحترموش في الابلة ويعايبو على بعضهم…

واللي بيسمع كلمت اهلو شو بنئلو شاطر شاطر، ويلي ما بيعزب في مدرستو شو بنئلو شاطر شاطر…

تمام يا شاطر هكي كويس ما اديروش شيطانة بيش تقعدوا شاطرين فاهمين؟

وانت ديما خليك عقلك كبير الزروق انا من يوم يومي نعرف، ومعش تقول سينما اصلا السينما حرااام!!

توا نعدوا نشوفوا الطالب المشاغب الشيطان نمشو لتواتي ليش درت هكي مش عيب عليك ادير شيطانة!!!

نقل حرفي عن التواتي حمد العيضه بسم الله الرحمن الرحيم والحمد لله ربي العالمين والصلاة والسلام على أشرف الأنبياء والمرسلين سيدنا محمد وعلى آله وصحبه أجمعين.. في البدايه أريد أن أعتذر من الأصدقاء الذين راسلوني وأخص بالذكر الذين طلبو مني الرد على عضوء المؤتمر الوطني عن الأخوان خليل الزروق الذي أتهمني بتقليد صوته والتشويش عليه ووصف الجلسه كأنه في مسرحيه … أولآ أنا لست بغبغاء يا زورق يا صاحبالخطابات الحماسيه والتي تذكرني بخطابات المقبور ولجانه الثوريه يا من تمجد في رئيس المؤتمر ( الكذب خيبه) سمعت أنك أمام مسجد أستغفر الله العظيم .. إذا أردت أن أقلد الأصوات في يومآ ماء فصدقني يا سيد زروق لن أقلد صوتك لسبب بسيط جدآ لأنه …………… أفهمها ثانيآ الذي حصل في تلك الجلسه أن هناك عضو من الأعضاء قام بشتم رئيس الوزراء والذي لم تتحدث أنت عنه يا سيد زروق يبدو أنه أعجبك يا أمام المسجد( أتامرون الناس بالبر وتنسون أنفسكم) ثانيآ الذي جرى في تلك الجلسه كانت جلسه فيها الكثير من النفاق مما أستفزني وقاطعتك .. كان الأجدى أن نناقش قظية الكفره والقضايا الأهم بدل من الهجوم على رئيس الوزراء ثالثآ أن عدتم عدنا يا سيد زروق يا أمام المسجد آكرر ( الكذب خيبه).

حي…! قصدك الزروق يكذب…. حي عليه ما يتشحم والله!

دقيقة دقيقة بس…

هما كنهم الاخوة حضرات اعضاء المؤتمر مايعرفوش يكتبوا؟؟ امشو للصفحات الفيسبوكية متعاتهم وشوفهم كيف يكتبو…

طبعا انا مش حنتكلم على المحترمة علا السنوسي لان كتيبتها  كانها كتيبة مراهق في منتدى انترنت…

لكن العار ان الاخطاء الاملائية حتى في مسودات رسمية للمؤتمر نحكي على مسودة العزل السياسي …

المهم كل ماسبق وما سنراه الايام القادمة يتبث ان من يحكمنا هي روضة ريكسوس لا مؤتمر ريكسوس العام…

وفي الحقيقة انا مازرتش ريكسوس لكن سمعت انتهم مدايرين قاعة العاب في جنب القاعة اللي يوروها لنا في التلفزيون

قالوها مش انا اللي قلتها…!

ودمتم يا اطفال حضانة ريكسوس فوق رؤوسنا!

الشعب الطوووط، اللي ما يعرفش العيب!

عُلا

امتنا الليبية العظيمة وهي تعيش في ازهى أيام نفاقها الإجتماعي المستمر منذ القدم، تنتفض ما بين طرفين… أحدهم عاشقٌ لجبريل ومتيم به وآخر كارهٌ له ومابين هؤلاء الطرفين هناك فئة “شبه مستقلة” كُلٌ منهم انضم لفئة…!

“الشعب الطوط” ربما اجحف بحق شعبنا وانا من هذا الشعب وهذا يعني ان العتب يقع عليا ان ايضًا… شعبنا العظيم وبعد ان سمع بفعلة العضو عُلا السنوسي عن قائمة تحالف القوى الوطنية بدائرة مسلاتة واشتغل القاموس, (( الطحلوبة علا تبصق في وجه المناضل المقريف)) و((العضوة عن تحالف الطحالب)) و((العضوة عن مدينة لطحالب)) وهلم جرا لانه في من قال كلام عيب وطعن في الشرف والخ… شعب الطوط العظيم، انه وفي أوج إستنكاركم للتصرفات البذئية عن تلك العضوة احييكم على بذائتكم المضاعفة…!

الا تستحوا…! تتنقدوها لتصرف بذي فتردون عيب العيب على عيبها… (( كَشْفتُوا بينا كللكم)) !

والا السادة انصار عُلا اللي يدافعوا عليها باستماتة ويبررولها في بصقتها في وجه المقريف … الا تستحوا!!, هل في هذه الفعلة من مبرر…!  ويكتبلك (( الديكتاتور المقريف يتلفظ بالفاظ بذيئة على السيدة عُلا)) والخ وحتى هما برضوا قالوا كلام طوووط على المقريف…

اليوم انكشف الحق ((يلي كان معروف من زمان اصلا)) اننا شعب يعشق الطوط… أحمد الله ان مافيش قناة لحياة الليبين والا مشت كلها قطع صوت (طوووط طووووط طووووووووط) !!

ما حارقلي دمي إلا اللي يدافعوا على الطرفين هضاك تلقاه نازل في علا والاخر نازل في المقريف… هضاك يوصفها بالمناضلة والاخر يوصف فيه بالمناضل وهكذا تستمر الحياة وتحلوا مع الروضة الوطنية العامة، لذا أناشد وبناءًا على توصيات القائد بالشروع في افكارها العظيمة وتحويل الروضة الوطنية العامة الى روضة وطنية تشاركية، لنضمن تعليم واساليب وأطر نموذجية في التريبة والتعليم داخل الروضة…!

راكم تتحشموا…!

عيب والله الا عيب!

عضوة تبصق علي وجوه اعضاء رئاسة المؤتمر

خبر مظلم… عضوة تبصق علي وجوه اعضاء رئاسة المؤتمر

قامت العضوة علا السنوسي بالبصق علي رئاسة المؤتمر الوطني العام اثناء الجلسة التي عقدت بالخيمة المجاورة لقاعة المؤتمر بعد ان منعوا اعضاءه من الدخول اليها من قبل الجرحي المعتصمين بداخلها .

وقالت مصادر لصحيفة ليبيا الجديدة بأن السنوسي بصقت علي وجوه اعضاء رئاسة المؤتمر بعد ان اتهمت من قبلهم هي وزميلها ابراهيم الغرياني عضو المؤتمر بأنهم قاموا بتمكين عدد من الجرحي بدخول الخيمة التي يعقد فيها المؤتمر

مؤامرة كبرى لنهب الاموال الليبية عن طريق الاجانب!

طفلة

دولٌ صليبية تريد ان تقضي على ليبيا، النسل الليبي يتعرض للخطر!، يودون سرقة اموال ليبيا، يريدون تنصير وتشييع الشعب الليبي… والخ من مؤامرات يبتدعها المبدعون كما عودونا دائمًا هي فقط بدعة “حسدية” و”عصبية”… شيئًا فشيئًا تُتنزع من المواطني الليبي الانسانية… لذلك رجاءً لا اود ان اسمع كلمة “الشعب الليبي شعب طيب وشعب مسالم” فهذا الوصف قد ولى عهده…!

’’

يعتبر ليبيا كل شخص مقيم في ليبيا وليس له جنسية أو رعوية أجنبية إذا توفر فيه أحد الشروط الآتية : 1. أن يكون قد ولد في ليبيا . 2. أن يكون أحد أبويه ولد في ليبيا . 3. أن يكون قد أقام في ليبيا مدة لا تقل عن عشر سنوات إقامة عادية .

‘‘
المادة 8، الفصل الثاني “حقوق الشعب”، الدستور الليبي 1951.

هكذا كان دستورنا… الدستور الذي وضعها اباءنا المؤسسين والاجداد قبل ستُ عقود ونيف! كان دستورنا ياسادة يمنح الجنسية وحق المواطنة الكاملة لابناء الليبيات المتزوجات من اخوة غير ليبيين.

اليوم… نرسم مؤامرات مضحة بل مبكية! ايصل عقلنا بانحطاط فكري لهذا المستوى…! عندما يقول احدهم انا ضد قرار علاوة الاولد “100” لاولد الليبيات من غير ليبيين… لانها ستجعل “الاجانب” يطمعون في الليبيات من أجل الحصول عليها اما الاخر فهو حريص على اموال الليبين اشد الحرص ويحسب ويستنتج ان ليبيا ستُضيع 5,000,000 على اولاد غير ليبيين وهذا اهدار للمال العام برائيه!… الرواية الساذجة جدًا هي فوبيا عداوة الاسلام فهذا القرار قد اقره المؤتمر بسبب مؤامرة امريكية للقضاء على الاسلام في ليبيا بمنح المال لغير مسلمين… والسذاجة هنا كثيرة… واّعي انها كزبد البحر لن تنتهي بسبب إنكماش عقولنا عن التفكير واتساعها في الاتكال وابتكار المؤامرات…!

كيف يمكن ان يكون هذا القرار يعادي الاسلام وتطالب المفتي بتحريمه هل وصل الجهل بنا الى هذا الحد بل جهلنا حتى ديننا على مايبدو الا يحرم ديننا زواج المسلمات من غير المسلمين…! فكيف سيكون ابنها كافرًا حكموا عقلكم كبيرًا قبل ان تتفوهوا باي عذر غير منطقي بل قبيح جدًا!

بالنسبة لقصة ضياع الاموال الليبية على ناس مش ليبية فمهما كان المبلغ لن يكون كمقدار مايهرب من اموال او يسرق وينهب! “ولا انا غلطان” وبعدين مش الفلوس نعطوهم لناس ولدوا في ليبيا وعندهم انتماء لليبيا اكثر من جنسية والدهم خير!؟ وهل الفلوس خسارة في ابناء الام الليبية!! -آآه- نسيت! يجب سحب الجنسية من كل ليبية تتجوز بغير ليبي وكلوا بما يرضي الله فهو مستعد ان يفسر اي اية او حديث على هواه والاسلام من “افكارهم الجاهلية” براء… ياناس تقدموا الى الوراء ولا تعدوا الى الخلف من المخجل ان اجدانا كانوا انبه واحنك منا رغم كل الظروف التي عانوها في الخمسينات…

سحقًا لنا بهكذا عقول!.

رئيس وزراءنا «الْمكَشر»

علي زيدان

ما اكثرهم اللي مع بداية المظاهرات في بنغازي يوم 15 فبراير من سنتين طلعوا ع الجزيرة والعربية وقالوا ع المتظاهرين جرذان وواخذين حبوب هلوسة في بث مباشر من ريكسوس اللي ركسسنا “عطه دعوة” خلونا ندعوا على ريكسوس كل مرة ان اطيح عليه حاجة ويتفجر اخر دعوة كانت ان فيلكس يطب عندهم في الريكسوس وتوا قعدنا ندعوا عليهم يطيح قمر صناعي! ماعلينا المهم في الجهة الاخرى وحدين قعدوا يطلعوا في استديوهات الجزيرة والآن والعربية وهلم جرا من هالقنوات وقعدوا يقولوا الان العالم سيعرف حقيقة الشعب الليبية (يقولوا فيها بصوت مؤتمر يعبر عن الإندهااااااش) وكعادة قنوات العرب قعدوا ماسكين فيه الموضوع هضا وديما يذكروا فيهن في الريبورتاجات الإخبارية ( اليوم يكشف الشعب الليبي عن حقيقته بعد ان اخفاه القذافي وراء خيمته اكثر من اربعة عقود) والخ من هالجُمل الرنانة… من هنا إنطلقت جملة “العالم يتساءل من هذا الرائع” وطيح مزاله اللي قالها (بصوت صالح اجعودة وكيل تويوتا المعتمد), ماعلينا ان فتحت مواضيع واجدة وكلهن مانبيش نحكي عليهن… ان اليوم بنحكي على اسطورة رئيس الوزارء… رئيس الوزراء العظيم هذا الرجل الشامخ القوي… انا مانبيش نتكلم عليه لين يكملن الشهرين متعت الصمت الإجباري… لكن والله في ريبلي من سيد لبناني على تويتر اسمه “اسامة” على سيد “غسان سالم” اللي بسليمته منعرفش لكن يبدو انه بروفسور… المهم البروفسور قال ان “بن زايدان”؛وواضح انه مايعرفش الاسم كويس لانه حسسني بان شيخ من شيوخ الامارات حاكما ومعيشنا في عز.. قليل الابتسام وجدي جدًا، والتبرير الذي كان من اسامة هو:

هو نحن عليش شعب منحوس هكي…! شن درنا في عمرنا اللي يحكمنا ويمثلنا قدم الناس والعالم لازم “يكَّشِف” بينا الله يكشف بيه!!، يعني يا يمشي حد مشفشف ويقعد يبحت فوق 24 ساعة “ينظر الى اعلى” والا يجي حد مداير (سمايل كبيــر D:) واول مايجي في جنبه جريح من غزة يجري “هرعًا”!…والا يحكمك انسان وفر علينا عناء حلاقة الشعر ولكن كلفنا ميزانية ضخمة لتوفير “طباخ” واستيراد كمبة من المناديل الفخمة “كلينكس” حتى يكفكف الدمع من عينيه التي ما ان تسمع بخبر وفاة أمريكي حتى تجهش بالبكاء وحسب الدراسات فإن المقريف يبكي كل 15 دقيقة!، والا يجيك رئيس وزراء مبتسم ولابس نظارات ويعطي في وعود وراء وعود وعربية ركيكة وبعد تكتشف انه وزع فلوسنا على موريتانيا وتونس والسودان واللي يجي ياخذ غير ماتجيش فاضي بس!.

واخيرًا جاءنا اليوم رئيس وزراء صام جاف غليظ القلب لا يعرف ان يتعامل مع الناس!! لم اشهد له حوارًا تلفزيونيًا واحدًا قدم ابتسامة او كانت روحة مرحة ولو في جزء من الثاني يا أخي!! (انا زيدان كان مكانه ومن اعصابه يركبني الضغط والسكر!) يا اخي زيدان خليك ريلاكس وروق!، ماتقولوليش الراجل تاعب ويحرق ويجري ع البلاد علشان هكي ديما مكشر ومتعصب… لا، كان زعله ع البلاد راه ماطلع منها ومشا لدافوس… راه ماطبع منها ومشا لاديس بابا! يقدر يدز وزير الخارجية ولا واحد من النواب والخ… ونحن عارفين ان هو قال حيمسك ملف الامن! لكن انه يجي ويقول لا الامن قاعد لكن الاوروبيين والاستراليين خايفين على مواطنيهم اكثر من لازم هضا تصريح عظيم تصريح جميل بكل! قصدي معش مازال من الممكن اننا نعيشوا في الاستغفال والاتهبال والاستعباط… المهم اضحك يا زوزو تضحك الدنيا في وجهك وماتوشهش صورة “هذا الشعب الرائع” اكثر ماهي متشوهة لدى هذا العالم الذي يتسأل!

وربي يعاوننا وخلاص!

‎((أعقل أنت وياه وبلا حقارة!.))

(هذه التدوينة تحتوي على الفاظ غير لبقة مع الاسف ) 

غضب

لما  يقعدوا يعاودوا في الدوة اللي سمعوها ومايقدروش حتى يجادلوك فيها …. لانهم باختصار هم مجرد شريط فاضي سجله في وحط في الراديو وشغله

واسمع الكلام العبيط …. كلام درر صراحة….

نحن مانبوش انتخابات للجنة الستين لتاسيس الدستور لاننا خايفين ان الشارع يختار ناس مش اكفاء!!!

شوية شوية ياسيد باهي انت يا كفوء ياللي درت قفزة فيلكس لكن مش علشان تحقيق انجاز علمي بس انجاز شخصي والجلوس على كرسي الحكم كيف قمعزت على كرسي ريكسوس الابيض اللي يلف هضا!!؟ معناها حتى انت مش كفوء ….

والا واحد اخر يجيك بكلام احقر من اللي فات ويرقي لك القاز ويقولك كان درنا انتخابات هضا بيمدد مدة المؤتمر ونخافوا من سيطرة القبلية على المرشحين!!

باهي يا كذاب (اه كذاب وفي نص عين اي واحد هكي يفكر)  هو من اللي اخر المؤتمر!!! مش في الاعلان الدستوري منصوص على 30 يوم المؤتمر هو اللي قعد يجري وراء العزل السياسي والمرتبات والربا والسفريات والخ من الهشتك بشتك الفاضي متاعهم… والا انا غالط!؟ مش هي اللي كانوا يلعبوا ويعينوا رئيس وزراء ويحولوه وكلها عناد في عناد وقمة الحقارة والسخف!

جو فروخ إبتدائي!!!!!

ينعنجد مناظركم وخلاص

وانت تترايشوا في المؤتمر زي الدجاج وطبعا مش لازم نتكلم ع الاخ السلفي

والا انا مفوض منقولش الاخ لاني مش سلفي وبالتالي مش مسلم وهذا يعني انني مش خوه ولو كنت كافر وابن لنفس وطنه!!!

ناس تريش في روحها ويتعايطوا تقول مستشفى قرقارش في طرابلس والهواري في بنغازي (مع احترامي لهم خوتنا في قرقراش وهواري لمقارنتي لهم بمصحة ريكسوس)

انتم مش واثقين في الشارع والشارع مش واثق فيكم فمن صوتح ارجح!؟ نحن ام انتم

عمومًا ايها “الراقيون” متاعين الريكسوس الشعب “الرعاع” اللي صوتلكم سينتفض ضدكم

ورغم اني مش فاهم شن قصد معمر بعنوان كتابه فلتحيا دولة الحقراء لاني ماقريتش….

فبنقوللك لن تحيا دولة الحقراء بتواجد “من لاتتثقون في نتاجهم الإنتخابي” اوكي…

هيا تشاو

وبئس المصير لكل حقير!

توضيحات:

1: لم اقصد تجريح شخص معين في المؤتمر ومع الاحترام للمحترمين!

2: التدوينة تدوينة غاضبة تعبر عن العقل الباطن…

~